[4]۔

جو دین کل عورت کے تشخص اور اس کے شناخت کی بات کر رہا تھا آج بھی کر رہا ہے لیکن افسوس ہے کہ کچھ لوگ حقائق کو دیکھنا ہی نہیں چاہتے اگر یہ غور کریں تو پائیں گے یہ اظہار آزادی اور عورت کے حقوق کی بازیابی کے کھوکھلے نعرے لگانے والے عورت کے لئے کسی بھرم اور اعتبار کے قائل نہیں ہے یہ تو اسے مارکیٹ کی رونق کے طور پر دیکھتے ہیں لیکن بعض لوگ مغرب کی دوغلی پالیسی سے غافل ہو کر نام نہاد روشن خیالی اور آزادی کا تاج سر پر سجا کر یہ دکھا نا چاہتے ہیں کہ وہ خود کس قدر عورت کے حقوق کے محافظ ہیں ۔ اب یہ صاحبان فکر و نظر پر ہے کہ وہ دیکھیں ایک طرف توحیدی تہذیب ہے جو عورت کے بنیادی حقوق کی بازیابی کا مطالبہ کرتی ہے اسکے تقدس کی قائل ہے اور دوسری طرف وہ مغربی شیطانی تہذیب ہے جو اس وقت تک عورت کی بات کرنے کو تیار نہیں جب تک اسے برہنہ نہ کر دے ۔

نام نہاد روشن خیال لوگ اور الحادی و مغربی تہذیب کا بھیانک چہرہ :

بعض نام نہاد روشن خیال مغربی تہذیب کی چکا چوند کی بات تو کرتے ہیں لیکن ذرا دیکھیں تو سہی وہاں عورت کی کیا حالت ہے آپ صرف برطانیہ کو لے لیں تو آپ کو نظر آئے مغربی تہذیب کا پرفریب نظارہ پیش کرنے والا یہ ملک کہاں کھڑا ـہے’’ یہ وہ ملک ہے جہاں ہر سال ایک کروڑ۲۵ ؍لاکھ خواتین گھریلولو تشدد کا شکار ہوتیں ہیں۔ ۸۰؍ ہزار کی بے حرمتی کی جاتی ہے۔ ویمن ایڈ فیڈریشن برطانیہ کے مطابق ہر ایک سو شادیوں میںسے ایک خاتون کو باقاعدہ منصوبہ بندی کے تحت نشانہ بنایا جاتا ہے۔ ایک رپورٹ کے مطابق دنیا کے مہذب ترین شہر لندن میں ۸۰؍ ہزار سے زائد خواتین طوائف کے پیشے سے وابستہ ہیں۔ یورپ کے بعض ملکوں میں شادیوں میں ۹۰ فیصد کمی آئی ہے پیدا ہونے والے ۷۰ فیصد ناجائز بچے پیدا ہوتے ہیں۔ امریکی محکمہ انصاف کے مطابق ہر ایک منٹ پر کسی نہ کسی امریکی عورت کے ساتھ جنسی زیادتی کی جاتی ہے ‘‘۔[5]

حقوق نسواں کی بات کرنے والے لوگوں کو خواتین کے بارے میں فکر مندی کیوں ؟

آج عورت کی آزادی کو لیکر جو بڑے بڑے ٹاک شو ز میں گفتگو ہو رہی ہے اور مغربی طرز زندگی کی مثالیں دی جا رہی ہیں تو ذرا گہرائی سے ان مثالوں کے اندر بھی جھانک کر دیکھیں ، کونسی روحانیت ہے جو ان روشن خیال لوگوں کو کہہ رہی ہے کہ ان کے بارے میں میں بولوگے تو روحانی سکون ملے گا ان کے حق میں بولوگے تو تمہیں کچھ حاصل ہوگا ؟ آخر کیا انہیں مل رہا ہے خواتین کے بارے میں بات کے ذریعہ سے اسے ہمیں دیکھنے کے ضرورت ہے قطعی طور پر ایسا نہیں ہے کہ انہیں کوئی صنف نسواں سے کوئی لگاو ہو کہ وہ اپنے تشخص کے ساتھ جئییے اپنے حقوق کی بات کرے ، اسکا حق ضائع نہ ہو اگر ایسا ہوتا تو محض حجاب کی بات نہیں ہے ہر شعبہ زندگی میں عورت کو با وقار سمجھا جاتا اسے محترم جانا جاتا ،اسکی عزت کی جاتی لیکن ہم دیکھتے ہیں کہ مغرب میں چاہے وہاں کے فلاسفہ ہوں ، اہل ذوق ہوں ، ماہرین فن اور اہل علم ہوں ، سب کے سب کا محور عورت کا حسن و جمال ہے ،کتنے ایسے لوگ ہیں جنہوں نے اپنی گفتگو کا مرکز عورت کے تقدس کو بنایا ہے اسکے وجود کی وسعتوں اسکی صلاحیتوں کو بنایا ہے۔

آج آپ مغرب میں کوئی جریدہ خریدیں کوئی میگزین لیں ہرحتی گھر میں استعمال کی چیزیں لیں ہر ایک پروڈیکٹ کے اوپر ایک نیم عریاں مسکراتی خاتون کی تصویر نظر آئے گا کیا شاہراہوں پر سڑکوں پر بڑے بڑے مالوں میں بڑی بڑی اسکرینوں پر تھرکتی ہوئی عورتوں کی تصاویر ہی سے انہیں انکا حق دلایا جا سکے گا گا ، ملبوسات سے لیکر زیور و جواہرات اور نئی نئی لگژری گاڑیوں کی تشہیر تک میں کیا عورت کے حسن و جمال کے پہلو کو سامنے لا کر ہی ان کے حق کی بات ہوگی ، کیا عورت کا پورا وجود اسی میں محدود ہے کہ وہ جاذب نظر ہے اسے مالک نے حسن سے نوازا ہے ؟ آج ہم مشرقی تہذیب و تمدن کے گہوارے میں بیٹھ کر کونسی تہذیب کو اختیار کرنے کی بات کر رہے ہیں کون سے لٹریچر کی بات کر رہے ہیں اس لٹریچر کی جس نے شہوت پرستی و عریا نیت کو اپنا تشخص بنا لیا ہے ۔ جس نے عورت کو کمائی اور آمدنی کی انڈسٹری بنا دیا ہے ۔ اپنے جسم کی نمائش کرنے والی عورتوں کو جس تہذیب نے سر آنکھوں بٹھا رکھا ہے اور سیدھی سادھی خواتین جو امور خانہ داری میں لگی رہتی ہیں انہیں بے وقوف سمجھا جاتا ہے ۔

کیا یہ تہذیب ہمارے لئے لائق تقلید ہے جس میں ماں باپ کے لئے گھر میں کوئی جگہ نہ ہو ، جہاں گھر چھوٹے ہو جائیں اور ماں باپ کو اولڈ ہاووس میں چھوڑ کر بچے سوچیں کہ سر کا بوجھ اتر گیا ٹکیا یہ ایسی تہذیب ہے جس کے بارے میں ہم بات تک کرنے کے روادار ہوں ؟

افسوس ہے کہ کہ الحادی تہذیب کے علمبرداروں نے اس بار اس سرزمین کو منتخب کیا ہے جو کبھی عرفان و تصوف کے مشاہیر و عمائدین کے لئے عظیم پناہ گاہ کے طور پر جانی جاتی تھی ، جہاں معنویت کا ایک خاص مقام تھا جسے مشرق میں روحانیت سے لگاو رکھنے والے باشندوں کے طور پر جانا جاتا تھا ، وہ سرزمین جہاں اگر ہندو رہے تو انکی خواتین بھی با پردہ رہیں چاہے وہ سر پر آنچل ڈال کر یا گھونگھٹ کے ذریعہ ہی کیوں نہ ہو ،اگر اس سرزمین پر عیسائی و یہودی رہے تو انہوں نے اپنے انداز میں حجاب کیا افسوس اسی سرزمین پر جہاں مشرقی تہذیب میں تمام مذہبوں کی خوشبو محسوس کی جاتی تھی ایک خاص رنگ کو ابھار نے کی کوشش کی جا رہی ہے اور کچھ لوگ اپنے اسلاف کی تاریخ کو بھلا کر ان لوگوں کے ہاتھوں کا کھلونا بن گئے جو صرف مسلمانوں کے خلاف ماحول بنانا چاہتے ہیں تاکہ اکثریتی فرقے کو اپنے حق میں کر سکیں ، جب کہ جو مین کھلاڑی ہیں وہ بساط سیاست پر نفرتوں کے ہاتھی گھوڑے سجائے بیٹھے ہیں کہ انہیں اپنا مقصود حاصل ہو لیکن انہیں اس بات کا احساس نہیں ہے کہ ہمیشہ کی طرح انہیں اس محاذ پر بھی شکست ہی نصیب ہونے والی ہے کیونکہ توحیدی تہذیب کا تعلق انسانی فطرت سے اور انسانی فطرت کے مقابل جو بھی آیا اسے منھ کی کھانی پڑی ہے اور اس بار میں ایسا ہی ہوگا ۔

بہت جلد توحیدی و الحادی تہذیب کے مابین زعفرانی معرکہ میں واضح ہو جائے گاس ا کہ نظریات کی جنگ مشرکین مکہ جب اس وقت نہ جیت سکے جب نبی رحمت صلی اللہ علیہ و علیہ وسلم و انکے ماننے والوں کو شعب ابی طالب میں محصور کر دیا گیا تھا اور کھانے پینے کی اشیاء کی ترسیل تک پر قدغن تھا ، حضور صلی اللہ علیہ و آلہ وسلم کے اقتصادی محاصرے سے لیکر ہر طرح کے منفی پروپیگنڈے کی جنگ کا نتیجہ کیا ہوا ، توحیدی فکر کا وارث فتح مکہ کے موقع پر مسکراتا ہوا داخل ہوا اور کچھ ہی سالوں میں اس تو حیدی فکر کا دائرہ مکہ کی سرحدوں سے نکل کر ایران و عراق و مصر و شام تک پہنچ گیا جسے مکہ میں ہی ختم کر دینے کے لئے مشرکین مکہ نے کیا کچھ جتن نہ کئے ،آج ہم دیکھ رہے ہیں یہ فاران کی چوٹیوں سے بلند ہونے والی ندائے توحیدی پوری دنیا میں سنی جا رہی ہے ، اور اسکے مقابل منصوبے بنانے والے کل ہی کی طرح آج بھی تماشایی ہیں ، شک نہیں ہے کہ آنے والے کچھ ہی دنوں میں مطلع کارزار جب صاف ہوگا تو ہر ایک کو معلوم پڑ جائے گا کہ بے حیائی کے مقابل ہمیشہ ہی حیا و عفت کو کامیابی ملتی ہے کبھی بھی حیاو غیرت کو بے حیائی و بے غیرتی کی تشہیر سے زیر نہیں کیا جا سکتا ۔